Akena p'Ojok

Akena p'Ojok

omuntu

Ekikula	musajja
Ensi y’obutuuze	Yuganda
Ennimi z'amanyi	Lungereza
Omulimu	munnabyabufuzi, military personnel, Minisita
Ekifo ky'alimu	Omubaka wa Palamenti ya Uganda
Mmemba w’ekibiina ky’ebyobufuzi	Uganda People's Congress

 

 From Wikidata

Akena p'Ojok Munnayuganda era munnabyabufuzi eyali mu bifo bya gavumenti eby'enjawulo mu myaka gya 1980, omuli Minisita w'amasannyalaze, poosita n'ebyempuliziganya. Yali muntu wa maanyi mu kibiina kya Uganda National Liberation Front/Army ekyayamba okuggyawo Idi Amin era nga y'enyigira mu ntalo z'okuwamba obuyinza ez'addirira.

Obuto bwe

P'Ojok, ava mu ggwanga ly'Abacholi, yazaalibwa mu Pupwonya, ekitundu eky'omu kyalo okumpi n'ekitundu eky'obusuubuzi ekya Atiak mu Ssaza lye Kilak, mu Disitulikiti y'e Amuru.

Obulamu bwe mu byobufuzi

Mu kiseera ky’obukulembeze bwa Iddi Amin, p’Ojok yaddukira e Kenya, n’asiisira mu Nairobi, gye yafuukira yinginiya omukulu mu kkampuni y'amasanyalaze mu Kenya eya Kenya Electricity Utility. Nga bali wamu ne Yonna Kanyomozi, Ephraim Kamuntu, Richard Kaijuka ne Bannayuganda abalala abatutumufu abaali mu buwaŋŋaanguse, p'Ojok baatandikawo ekibiina kyabwe ekya Save Uganda Movement (SUM), ekibiina ky'abatujju abaalwanyisa Iddi Amin oluvannyuma ne kyegatta wansi wa bendera ya Uganda National Liberation Front (UNLF) n'ebibinja ebyalina ebigendererwa ebifaanagana ng'ekyabwe, awamu n'amagye ga Tanzania, ne baggyako Iddi Amin mu mwaka gwa 1979.

Mu lutalo lwa Uganda ne Tanzania, p'Ojok yali mumyuka wa Ssentebe w'omukago gw'amagye ogwakolebwa okutondawo eggye lya Uganda National Liberation Army (UNLA, ekiwayi ky'amagye ekya UNLF) n'eggye lya Tanzania People's Defence Force, ekyaviirako Amin okuggyibwa mu buyinza. Oluvannyuma yafuuka omumyuka wa Pulezidenti wa UNLF, ekiwayi ekyafuga Uganda amangu ddala nga Iddi Amin avudde mu bukulembeze. Akena p'Ojok yalondebwa okufuuka Pulezidenti wa Uganda nga yadda mu bigere bya Yusuf Lule eyali Pulezidenti oluvannyuma lwa Iddi Amin. Wabula oluvannyuma lw'olukuŋŋaana lwa The Moshi Conference, Godfrey Binaisa yalondebwa okubeera Pulezidenti mu kifo ekyo.

Ebibiina by’obufuzi bwe byali bitondebwawo mu kwetegekera okulonda kwa bonna okwa 1980, p’Ojok yavuganya ku bukulembeze bwa Uganda Patriotic Movement (UPM), kyokka Yoweri Museveni ye yalondebwa ku kifo kino. Akena p'Ojok oluvannyuma yeegatta ku kibiina ky'ebyobufuzi ekya Uganda People's Congress (UPC), n'afuuka omubaka wa Paalamenti eyali akiikirira Obugwanjuba bwa Gulu, oluvannyuma lw'okuwangula eyali amuvuganya Anthony Ochaya owa Democratic Party. Ekibiina ky'ebyobufuzi ekya Uganda People's Congress kye kyawangula akalulu (akaali kamanyiddwa nti kabbiddwa). Akena p'Ojok yafuuka Minisita w'amasannyalaze n'ebyempuliziganya, era oluvannyuma n'akola emirimu egy'enjawulo nga Minisita wa kabineeti mu gavumenti ya Milton Obote eya UPC.

Mu 1985, gavumenti ya Obote yagobebwa mu buyinza mu lutalo lw'okuwamba gavumenti olwakulemberwa Tito Okello ne Bazilio Olara-Okello . Mu 1986, oluvannyuma lw’akavuyo akaddirira mu kuwamba gavumenti, eggye lya Yoweri Museveni erya National Resistance Army, eryali limaze emyaka mukaaga nga lirwanagana ne gavumenti ya Obote, ly'awamba obuyinza. P’jok yagaana okwegatta ku gavumenti ya Museveni bwe yamusaba era mu 1987 yakwatibwa n’aggulwako omusango gw’okulya mu nsi ye olukwe olw’ebigambibwa nti yali akuŋŋaanya eby'okulwanyisa okusuula gavumenti. Tewali kiwandiiko kyonna kikakasa nti yasingisibwa emisango egyo, naye yasindikibwa mu kkomera. Mu 1990 yayimbulwa oluvannyuma lw'okusonyiyibwa kwa Pulezidenti Museveni, oluvannyuma n’ava mu Uganda n’asenga mu Bungereza.

Ku ntandikwa ya 2005, ekibiina ky’abakadde b’Acholi kyatuukirira p’Ojok ne bamusaba okukiikirira Abacholi mu Uganda People’s Congress, ekiteeso kye yagaana.

Okuva mu myaka gya 1990, p'Ojok abadde abeera ne mukyala we n'abaana ku njegoyego z'ekibuga London.

Ebiwandiiko

• Nyai, Dick. The Origins of the Uganda Luwero War. Pdf Paper Submissions .