Ceasar Achellam

Caesar Achellam (agamba nti yazaalibwa mu 1963) yaliko Major Genero mu ggye lya Lord’s Resistance Army okutuusa lwe yawambibwa mu 2012.

Okwegatta ku LRA

Achellam yeegatta ku LRA kyeyagalire ku nkomerero y’emyaka gya 1980 oluvannyuma lw’okulwanirira eggye lya Uganda People’s Democratic Army (UPDA), ekibiina ky’abayeekera mu bukiikakkono bwa Uganda ekyasooka LRA. Yafuna okutendekebwa mu butongole mu by’amagye era yateranga okusomesa mu kutendekebwa mu by’amagye eri abalwanyi ba LRA. Achellam yali ayogera Oluwarabu, obukugu bwe yakozesa okuyambako okuddukanya enkolagana ya LRA ey’obukodyo ne gavumenti ya Sudan e Khartoum.

Nga Achellam tannawambibwa, enkolagana ye ne Joseph Kony yali tennakakasibwa. Okumala emyaka, ekibinja kya Achellam kyakoleranga kumpi nnyo n’ekibinja kya Kony, kyokka Kony yasibira Achellam mu nnyumba mu makkati ga 2007 olw’okugaana okwenyigira ennyo mu nteeseganya z’emirembe ne Juba. Achellam yali asabye Kony okuddamu okukwatagana n’abaserikale b’amagye ga Sudan mu South Darfur. Vincent Otti, eyali omumyuka wa Kony mu kiseera ekyo, yamatiza Kony okugenda mu maaso n’enteeseganya z’emirembe era n’alumiriza Achellam mu lwatu nti yafuna ssente okuva mu Basudan nga tazitegeezezzaako Kony. Wabula oluvannyuma lwa Otti okuttibwa ku nkomerero ya 2007, Kony yaggyako Achellam omusango era n’amuddiza ekifo kye ng’omuduumizi omukulu .

Achellam yasibibwa amagye ga Uganda okumpi n’ensalo ya CAR/Congo mu mwezi gw'okutaano mu 2012.

Okusinziira ku Howard Buffett mu kitabo kye ekya 40 Chances, yasisinkana Achellam. Okusinziira ku Buffett, Achellam yakunganya abaana okubafuula abajaasi abato era abaddu b’akaboozi wansi wa Joseph Kony.