John Senyonyi

 

John Musisi Senyonyi Munnayuganda omukugu mu ssomo ly'okubala, omusomesa ku matendekero aga waggulu,omubuulizi w'enjiri era addukanya amatendekero g'ebyenjigiriza. Yeeyali omumyuka wa ccansala wa yunivasite ya Uganda Christian University, yunivasite ey’obwannannyini eyakkirizibwa ekitongole ekitwala eby'enjigiriza ebya waggulu (Uganda National Council of Higher Education -UNCHE), mu 1997. Yalondebwa ku kifo ekyo mu 2010. Oluvannyuma lw’emyaka kkumi egy'omuddiringana mu kifo ekyo, yawummula, obuvunaanyizibwa n'abukwasa Aaron Mushengyezi, mu August 2020.

Obuvo bwe n’okusoma kwe

Yazaalibwa mu Disitulikiti y’e Nakasongola, mu 1956, eri Eriakimu Kajja, omusomesa w’essomero ne Mukyala Kajja, omukyala ow’awaka omujjuvu. Y’omu ku baganda be ekkumi na basatu. Omu ku baganda be yali omugenzi Peter Nyombi, eyali Ssaabawolereza wa Uganda era eyali omubaka wa Palamenti ow'essaza ly'eBuruuli " mu disitulikiti y'e Nakasongola.

Okuva mu 1961 okutuuka mu 1968, Senyonyi yasomera ku ssomero lya Nakasongola Primary School n’oluvannyuma Bbowa Church of Uganda Primary School. Okuva mu 1969 okutuuka mu 1972, yasomera ku Ndejje Senior Secondary School ku misomo gye egya siniya eyokuna . Oluvannyuma yaaada ku Kings College Budo, ku misomo gye egya siniya eyomukaaga, okuva mu 1973 okutuuka mu 1974. Mu 1975, yaweebwa ekifo ku yunivasite y'e Nairobi, gye yasomera okubala, n’atikkirwa ddiguli esooka mu kubala mu 1978. Oluvannyuma, yafuna satifikeeti mu by'okuddukanya emirimu ,okuva mu International College of Management ,Sydney, mu Australia. Era alina ddiguli eyokubiri mu by'eddini, okuva mu yunivasite ya Trinity International University, mu Amerika, gye yafuna mu 1992. Ddiguli ye eyokusatu mu bibalo by'okubala (Doctorate in mathematical Statistics), yafunibwa okuva mu yunivasite y'e Melbourne, mu Australia, mu 1984.

Ebyafaayo by’emirimu

Mu 1978, Senyonyi yakomawo mu Uganda n’atandika okusomesa mu yunivasite y’e Makerere, yunivasite esinga obunenne n'obukadde mu matendekero ga Uganda aga gavumenti . Yavaayo n’agenda okusoma mu Australia, wakati wa 1979 ne 1984, nnaakomawo okwongera okusomesa ku Makerere. Yava e Makerere mu 1988 era okumala emyaka 13, okutuusa mu 2000, yatambula ensi yonna ng’abuulira enjiri n’ekibiina ekiyitibwa African Evangelistic Enterprise. Yasinga kutambula munda mu Afirika ne mu Amerika, naye ne mu Bulaaya .

Mu 2001, yeegatta ku yunivasite ya Uganda Christian University ng’omulyowi wa yunivasite ow'emyoyo. Nga wayise emyaka ebiri n’ekitundu, mu 2003, yakyuka n'afuuka omumyuka wa Ccansala avunanyizibwa ku by'ebyensimbi n’enzirukanya y’emirimu. Nga wayise emyaka esatu, mu 2006, yalondebwa ku kifo ekyakatondebwawo eky’omumyuka wa ccansala ow’ebyenkulaakulana n’enkolagana ey'ebweru. Yaweereza mu kifo ekyo okutuusa mu mwezi ogwomwenda 2010 lwe yalondebwa okuba omumyuka wa ccansala wa yunivasite ya Uganda Christian University; omumyuka wa ccansala owookubiri mu byafaayo by’ettendekero lino. Mu 2020 yawummula okuva mu buweereza bwa yunivasite ng’omumyuka wa ccansala owookubiri bukya Yunivasite etandikibwawo. Asigadde mu buweereza bwa Katonda n’ekkanisa ng’omubuulizi w’e njiri omujjumbize. Mufumbo ne kanoni Dr Ruth Senyonyi naye aweerezza ekkanisa okumala emyaka mingi nga pulezidenti w'ettwale ery’ekibiina ky'abakyala abaagattibwa mu bufumbo obutukuvu (Mothers' Union) eky'ekkanisa ya Uganda.

Laba ne

-Yunivasite ya Uganda -Amatendekero ga Uganda aga bizinensi -Abasomesa ba Uganda ab'amatendekero aga waggulu

Ebirala eby'okulowoozaako

Senyonyi taata mufumbo alina omwana omu ow'obuwala n’abatabani basatu. Musumba eyatuuzibwa mu kkanisa ya Uganda .

Ebijuliziddwa

1. Campus Times (7 December 2013). "Profile: Reverend Doctor John Senyonyi, Vice Chancellor of Uganda Christian University". Kampala: Campus Times Uganda. Retrieved 19 December 2020.
2. "Outgoing UCU Vice Chancellor Releases Statement, Pens Emotional Farewell to Students and Staff". Kampala: Campus Bee Uganda. February 2020. Retrieved 19 December 2020.
3. Kam Isaac (30 August 2020). "Uganda Christian University Installs 3rd Vice Chancellor". Kigali: Taarifa Rwanda. Retrieved 19 December 2020.
4. Carol Kasujja (10 October 2018). "Nyombi's family eulogises former Attorney General". New Vision. Kampala. Retrieved 19 December 2020.
5. Joel Ogwang (29 June 2010). "Profile: Dr. Senyonyi, Man of Many Hats Takes Over At UCU". New Vision. Kampala. Retrieved 19 October 2020.
6. Uganda Christian University (29 June 2010). "A biography of Dr. John Senyonyi". Mukono, Uganda: Uganda Christian University. Archived from the original (Archived from the original on 8 September 2014) on 8 September 2014. Retrieved 19 December 2020.

Ebijuliziddwa wabweru wa wikipedia

• Okuzuukira Kubuuse Okusomoka Ennyanja