Kiwanuka Sulaiman

Kiwanuka Sulaiman

Munnayuganda munnabyabufuzi

Omuntu

Ekikula	musajja
Ensi y’o­bu­tuu­ze	Uganda
Yazaa­lib­wa nga	20 Gwamwenda(Mutunda) 1982
Gy'a­zaal­wa	Mukono Disitulikiti
Ennimi z'amanyi	Lungereza
Omulimu	omusambi w′omupiira, munnabyabufuzi, legislator
Ekifo ky'alimu	Omubaka wa Palamenti ya Uganda
Mmemba w’e­ki­bii­na ky’e­byo­bu­fu­zi	National Unity Platform
Okwe­siim­ba­wo kwe mu kalulu	Akalulu ka Uganda aka 2026
Omuzannyo	omupiira ogw'ebigere
Mmemba wa	12th Parliament of Uganda

Kiwanuka Sulaiman munnabyabufuzi, musuubuzi era eyali omuzannyi w'omupiira gw'ensimbi Munnayuganda, eyazannyaako ng'omuteebi kiraabu ya Express FC ne Tooro United FC bweyali tannawummula mirimu gye olw'obuvune. Oluvannyuma yafuuka nnannyini ttiimu ya The Spartans FC. Mutabani w’eyali addukanya emizannyo gy’emmotoka z'empaka, omugenzi Hajji Juma Nkambwe, eyali abeera e Wanjeyo.

Ye mubaka mu Paalamenti akiikirira abantu b'e Nakifuma,

Obuto bwe n'okusoma kwe

Sulaiman yazaalibwa Hajji Juma Nkambwe ne Hajjat Hadijah Namatovu. Oluvannyuma lw’okuzaalibwa kwe, teyamala biseera bingi ne nnyina eyalina okuddayo okutwala emisomo gye mu maaso. Yasigala ne Jjajjaawe Nanfuka Walia eyabeeranga e Bweyogerere.

Nnassale ye yagisomera ku Nursery Ku Muzikiti e Bweyogerere nga tannaba kwegatta ku Hassan Trabih okusoma pulayimale esooka okutuuka mu y'omusanvu. Ku kusoma kwe okwa siniya, yeegatta ku Bweyogerere Secondary School gye yasomera siniya esooka n'eyokubiri. Olw'okuba yali muzannyi wa mupiira, omutendesi we era omusomesa Kaddu Badru yatambulanga naye mu masomero asatu ag’enjawulo okuli Naggalama Islamic, Kasawo Secondary School n'oluvannyuma Namagabi Secondary School - Kayunga gye yatuulira Siniya ey'okuna. Yaddamu okwegatta ku ssomero lya Namagabi Secondary School, Kayunga n’afuna satifikeeti y’ebyenjigiriza mu siniya ey'omukaaga okuva ku mukulu w’essomero Yusuf Kinene era n’afuuka akulira ebyemizannyo mu kiseera ekyo.

Yasoma Eby'enfuna okuva mu Yunivasite y'e Makerere .

Enzirukanya y'omupiira gw'ebigere

Mu kiseera kye yamala ng'akulira The Spartans FC mu 2018, yafuna obutakkaanya n'ekitongole ekikulira omupiira mu ggwanga ekya Federation of Uganda Football Associations -( FUFA) ku ky’okuggya Isaac Ogwang okuva mu kiraabu ya SC Villa era ekyaviirako The Spartans FC okugobwa mu mpaka za FUFA.

Ye mutandisi w'Ekibbiitu ky'Ebyemizannyo e Nakifuma, ekibeerawo ku nkomerero ya buli mwaka. Emizannyo mingi gibeerawo mu kiruubirirwa ky'okufuula Nakifuma "Brazil ya Uganda'.

Mu Gwekkumineebiri 2021, Sulaiman yategeka ekivvulu kya Boxing Day eky’obwereere e Kimenyedde, mwe yassa ssente z’ebirabo obukadde 2 mu mizannyo egy’enjawulo ng’ebikonde, emisinde, okumeggana, amazina, okubaka, obugaali bw'empakka n’omupiira. Kyakungaanya abalabi okuva e Nagojje, Ntunda, Kimenyedde, Kasawo, Seeta, Kabimbiri, Namuganga, Naggalama ne Namataba. Kimenyedde Select FC mu mupiira yawangula The Spartans FC ggoolo 4-2 mu peneti oluvannyuma lw’okugwa amaliri ggoolo 1-1 mu ddakiika 90 ez'essalira. Baka Ocheng yateebera Kimenyedde Select ggoolo ey'ekyenkanyi mu ddakiika ezisembayo olw'okuba Emma Kalyowa yali yakulembezza dda The Spartans n'ewangula ekirabo kya kakadde 1.

Obuvujjirizi ku masaza ga Buganda

Kiwanuka Sulaiman ng'atongozebwa nga Maneja wa Buganda Masaza Select mu 2022

Yafuulibwa omu ku kakiiko ka Masaza mu 2021 bwe yeegatta ku Ssaza Kyaggwe era okuva olwo abadde muvujjirizi omutongole ow’empaka zonna. Yasiimibwa ng’omu ku bantu abakulu mu kuwagira empaka z’amasaza. Mu Masaza 2021, yassa mu Ssaza Kyaggwe doola 1900 bwe bukadde 6,650,000/= mu za Uganda wadde nga baawangulwa mu luzannya oluddirira oluddiirira olw'akamalirizo

Obulamu bw’ebyobufuzi

Yali mu lw'okaano lw’okuvuganya ku kifo ky’omubaka wa Paalamenti owa Nakifuma mu 2021 ng’ayavuganya nga namunigina era naawangulwa Fred Ssimbwa eyali akwatidde National Unity Platform bendera. Kiwanuka yayambako mu kuzimba Poliisi y'e Kateete

Pulojekiti z'ekitongole ki Friends of Kiwanuka

Eby'obulimi n’obulunzi

Friends Of Kiwanuka Organization, kitongole kya bwannakyewa ekyatandikibwawo Omubaka Sulaiman Kiwanuka mu 2021 okuyamba ku Bannamukono. Ekitongole kino kiyambye mu kuwagira abalimi n’abalunzi, ensigo, ebikozesebwa n'ebirala. Mu Gwomwenda gwa 2022, amagombolola abiri mu kitundu ky'e Mukono, Nakifuma ne Namuganga, abalimi abasoba mu 100 baafuna ensigo za Kasooli nga zibalirirwamu obukadde bwa Uganda 10 okutumbula pulojekiti zaabwe ez’okulima.

Enkulaakulana y’ebyemizannyo mu masomero Kasawo Secondary School, Kigayaza, Namagabi secondary school, Kayunga, Latifah Mixed Secondary School, Kabimba ge gamu ku masomero agaweebwa amaanyi nga gayita mu nsengeka z’ebyemizannyo. Mu Gwokusatu 2022, Kasawo Secondary School lyafuna ensawo 50 eza Sementi n'omujoozi omupya ssaako akakadde ka ssente oluvannyuma lw'omupiira gw'omukwano ne The Spartans Fc.

Ebituukiddwaako mu mizannyo

Mu 2021, Kiwanuka yawaayo doola 400 eri omuzannyi wa Uganda Fauzia Najjemba, munnakitone enzaalwa ya Nakifuma, ng’okumwebaza olw’okuwanika Nakifuma ku mutendera gw’Eggwanga. Fauzia yali azannyira mu Kampala Queens WFC mu liigi y'abakyala ey'ababinwera eya FUFA Women Super League. Kiwanuka Sulaiman yaluubirira okufuula Nakifuma "Brazil ya Uganda era mu kukola ekyo; yatumbula n'okuwa ebitone amaanyi okumanyika. Mu Gwokubiri 2024, yakyaza abaaliko bannakinku mu kusambira Uganda Cranes mu kisaawe kya Kikube e Nakifuma mu mupiira ogw'omukwano ne ttiimu ya Nakifuma Select Fc ogwalimu abamu ku bannabitone ba ttiimu y'eggwanga nga Tony Mawejje, Geofrey Massa, Yunus Sentamu, Joseph Kizito, Moses Waiswa n'abalala .

Ekizimbe ky'ebyemizannyo ekya Nsaji Sports Complex

Mu kiseera kino Kiwanuka azimba ekifo eky’ebyemizannyo ekyatandika mu 2022, wansi w’erinnya lya Nsangi Sports Complex, ekisangibwa e Nsaji, Nakifuma, nga kitudde ku ttaka eriweza yiika 7 nga ku zino kusuubirwa okukolebwako emizannyo egy'enjawulo ku mutendera gw’ensi yonna. Ekizimbe kya Nsaji Sports Complex kisuubirwa okuggulwawo mu mwaka gwa 2029.

Laba ne.

• Bobi Wine
• Ekibiina ky'ebyobufuzi ekya National Unity Platform