Sembuya Christopher Columbus

Christopher Columbus Sembuya, CC, (yazaalibwa 1937 - yafa 11 Gusooka 2022), munnamakolero, musuubuzi, mulimi, amanyindwa ennyo mu nsi naddala mu Yuganda.

Yasinga ku manyikibwa olwa omulimu omunene gwe yakola mu kutandika n’okuddukanya kkampuni eziyitibwa Sembule.

Bino bye bimu ku bitongole ebinene oba kkampuni ebya sooka okuteekebwawo abaddugavu mu Yuganda.

Emyaka Egyasooka

Sembuya yazaalibwa mu 1937 e Nkokonjeru mu ssaza ly'e Kyaggwe. Kitaawe, Omugenzi Yafesi Magulu yali mulimi wa Kooko era ffaamu ye ye yali esinga obunene mu Afirika y'ebuvanjuba. Maamawe yali Omugenzi Rachel Magulu. Sembuya yasomera Kako Primary School ne St. Leo's College, Kyegobe e Fort Portal. Sembuya yatandikira okutunda ebikozesebwa mu kuzimba mu dduuka (mu Ndeeba) lya Maamawe omugenzi Rachel. Era yeegattibwako mugandawe Omugenzi Michael Mayanja n'oluvannyuma Mugandawe Omugenzi Henry Buwule. Oluvannyuma Sembuya yakolerako mu Gavumenti ya Yuganda mu bifo eby’enjawulo nga Disitulikiti kamisona (DC) e Madi n'e Karamoja (mu myaka gy'enkaaga, 1960s) ne mu minisitule y’ebyenfuna nga Senior Finance Officer. Bwe yava mu gavumenti, Sembuya yeegatta ku mugandawe Buwule ne baddukanya edduuka lya Ndeeba Hardware Stores mu Ndeeba, Lubaga, Kampala.

Famire

Omugenzi yali ava mu luggya lwa Magulu, mu lunyiriri lwa Wamala, Omutuba gwa Kamaala, mu ssiga lya Kivuba era yali yeddira Mmamba ekulemberwa Ggabunga.

Yawasa Omugenzi Sembuya Nalumu Mary nga 12 ogwekkumineebiri 1964 (12/12/1964) ku lutikko e Namirembe, Kyaddondo. Baazaala abaana bataano okuli (omwanawe omukulu) Rachel Nankya Lubega, Francis Sembuya, Jackie Nansubuga, Ronald Kizito, Rebecca Nalumu Nnawoova Wamono.

Nga 8 omwezi gw'omukaaga omwaka 1979, mukyalawe Mary, yattibwa abaserikale ba Tanzaniya abaali bazze okubba emmotoka ye n'essente.

Abaana be abalala kwe kuli Victoria Sembuya, Diana Namayanja, Dennis Sembuya, Daudi Sembuya, Michael Nsubuga, Stephen Sembuya, Priscilla Namubiru ne Barbara Namande.

Yaleka Nnamwandu Mukyala Rita Ddungu Sembuya.

Ddiini

Sembuya yali mukulisitaayo era yasabiranga ku Lutikko e Namirembe ne All Saints Church e Nakasero.

Sembule

Sembuya ne mugandawe Henry Buwule batandika kkampuni eya Kkalwe, Sembule Steel Mills Limited. Baatandikira ekkolero lino mu Ggalagi y'enju yaabwe era nga balina masiini enkadde bbiri ezikola emisumaali. Oluvannyuma baagulayo ebyuma by'emisumaali ebikadde okuva mu kkampuni ya Wafios. Eno Sembule Steel Mills Limited ye yakula n'evaamu amakolero amalala, bbanka ne Kkampuni ya yinsuwa. Sembule ye Kkampuni y'abaddugavu eyasooka okukola amabaati ga "color", obutimba bw'engalama, n'ebirala. Sembuya ne Buwule be baddugavu abasooka okukola bbanka y'obwananyini mu Yuganda, Ttivi sitenseni (CTV) ey'obwannanyini, Kkampuni ey'obwananyini eya Yinsuwa, Kkampuni y'ebyamasannyalaze eya Sembule Electronics Limited, yali ekola Leediyo (nga Makula), Ttivvi, amataala g'amasannyalaze "bbalubbu", Essimu z'amapeesa n'ebirala.

Bbanka eno yatondebwawo mu mwezi ogusooka omwaka lukumi mu lwenda kinaana mu ettaano (01/1985). Mu mwezi gwoomusanvu omwaka lukumi mu lwenda kyenda mu gumu (07/1991), Bbanka yagaziwa n'efuuka Sembule Investment Bank. Era mu mwezi gw'ekkumi n'ogumu omwaka lukumu mu lwenda kyenda mu mukaaga (11/1996), bbanka yaddamu n'egaziwa n'efuuka Sembule Commercial Bank. Leero Bbanka eno eyitibwa Bank of Africa, Uganda Limited.

Kkampuni ya yinsuwa yayitibwanga Pan World Insurance Company, PWICO, era yatondebwawo mu lukumi mu lwenda kinaana mu munaana (1988). Mu mwezi ogusooka nkumi bbiri mu ena (01/2004) yeegatta ne Kkampuni endala n'efuuka Lion Assurance Company. Lion Assurance Company yeegatta ku kkampuni ya yinsuwa endala era kati yafuuka kitundu kya Sanlam Insurance Uganda.

Oluvannyuma kkampuni eno CTV yafuuka WBS TV.

Emidaali

Mu mwaka 2020, Sembuya yaweebwa omudaali gw'obuzira (Golden Jubilee). Omudaali gw'amukwasibwa omukulembeze wa Yuganda, Pulezidenti Yoweri Museveni.

Obugabi

Sembuya yalina omutima omugabi era yakola kinene mu kukulaakulanya ekibuga Nkokonjeru n'ekyalo Kikwayi. Yaweererera n'okusomesa abantu bangi nnyo.

Omwoyo gw'eggwanga

Mu myaka gy'ekinaana, Sembuya yawagira n'assa n'ensimbi mu bayeekera ba NRM ng'ayita mu mugenzi Samson Kisekka.

Okufa

Omugenzi Sembuya yafa nga 11 Gusooka 2022 mu ddwaliro lya Kampala Hospital e Kololo. Yazikibwa mu kiggya kya kitaawe Magulu ku kyalo Kikwayi mu ddisitulikiti ya Buikwe. Olumbe lw'omugenzi C.C.Sembuya lwayabizibwa ng'abiri mu lumu, Gusooka 2023 (21/01/2023).