Zohran Mamdani

Zohran Kwame Mamdani

 

Zohran Kwame Mamdani (yazaalibwa 18 Ogwekkumi, 1991) munnabyabufuzi Omumerika asibuka mu ggwanga Uganda era mu kiseera kino ye meeya omulonde ow’ekibuga New York . Memba w’ekibiina kya Democratic Party wamu n'ekisinde ki Democratic Socialists of America. Nga tannavuganya wamu n'okuwangula obwa Meeya bwa New York yasooka kuba mukiise mu lukiiko olukulu mu ssaza New York nga akiikirira ekintundu ekiyitibwa 36th district okuva mu 2021. America efugibwa ku musingi gwa federo ero buli saza lilina olukiiko olwalyo nga bwolaba paalamenti. 36th district mu lukiiko lwa New York etwaaliramu ebintu omuli Queens e Astoria .

Mamdani yazaalibwa mu ddwaliro e Nsambya kibuga Kampala era kitaawe ye kakensa Mahmood Mamdani eyasomesako ku yunivasite e Makerere ate nyina ye muzanyi wa firimu Mira Nair . Nga wa myaka etaano famire ye yasenguka okudda mu kibuga Cape Town, mu South Africa. Mamdani bwe yali aweza emyaka musanvu, bazadde be baasenguka nate era ku luno bagenda mu Amerika, ne basenga mu kibuga New York. Mamdani yasomera ku Bronx High School of Science gyeyava okwegatta ku Bowdoin College mu saza Maine era nasoma diguli ye esooka nga essira alitadde ku byafaayo, eby'obufuuzi n'embeera z'omuddugavu okutwaliza awamu mu lungereza ekiyitibwa Africana studies era natikkirwa mu 2014.

Oluvannyuma lw'okukola nga kitunzi w'amayumba kwossa okuyimba, Mamdani yatandikiriza mpola okwetaba mu byobufuzi ebiri ku mutendera ogwessaza New York nga yatandika nga avunaanyizibwa ku nzirukanya ya kampeyini za munnabyabufuzi Khader El-Yateem wamu ne Ross Barkan. Oluvannyuma mu mwaka 2020 yeesowolayo okuvuganya okukiika mu lukiiko lw'essaza era bwatyo namegga Aravella Simotas eyali amaze ebisanja bitaano mu kifo ekyo mu kamyufu the Democratic Party bwatyo naalondebwa okukiikirira Queens ku kisanja kya myaka 2 oluvannyuma yaddamu okuwangula mu mwaka 2022 and 2024 wonna nga tavuganyizibwa.

Mu Gwekkumi 2024, Mamdani yalangirira nti yali waakuvuganya ku bwa meeya bw’ekibuga New York mu kulonda kwa 2025 . Mu Gwomukaaga 2025, Mamdani yawangula akamyuufu mu kibiina kya Democratic party era nga wano yamegga Andrew Cuomo, eyaliko Gavana w’essaza New York. Oluvannyuma lwa Cuomo obutamatira yasalawo okwesimbawo ku bwa namunigina wabula Mamdani yamumegga mu kulonda okwaliwo nga 4 Ogwekuminoogumu 2025. Akalulu kano era kaalimu ne munna Republican Curtis Sliwawabula obululu 50.4% bwawa Mamdani obuwanguzi.

Mamdani kampeyini ye yagyesigamya ku miramwa egiwerako omuliebbeeyi y’ebintu esoboka okussaawo entambula y'olukale eya bbaasi nga ssi zakusasulira, gavumenti okwenyigira mu ndabirira yabaana, ekibuga okubeeramu amaduuka g'ebintu aga gavumenti, eddembe ly’abasiyazi nabalala abagwa mu ttuluba li LGBTQ,omusaala ogw'essalira waakiri doola 30 buli mukozi obutasukka 2030 n'emiramwa emirala. Mamdani era awagira okwongeza emisolo ku bitongole n’ebizinensi eziyingiza amagoba agasukka akakadde ka doola omwaka . Obuwanguzi bwa Mamdani bwamufuula omuntu asooka mu byafaayo mu matuluba ageenjawulo omuli Omuyindi-Omumerika , Munnayuganda-Omumerika , Omusiraamu , omuntu eyazaalibwa mu myaka gya '90 okuwangula obwa meeya wa New York Mamdani era ye munnakisinde ki democratic socialists owookubiri okufuuka meeya w'ekibuga New York nga eyasooka ye David Dinkins . Ye meeya ow'omusanvu okulondebwa mu kibuga New York nga tasibuka mu Amerika okuva mu 1834, ba meeya lwe baatandika okulondebwa mu kalulu ka bonna. Asuubirwa okuyingira ofiisi nga 1 Ogwolubereberye, 2026.

Obuto n’emisomo

Mamdani yazaalibwa 18 Ogwekkumi, 1991, mu Kampala, Uganda. Ye mwana yekka owa kakensa w'ebyobufuzi Mahmood Mamdani n’omuzannyi wa firimu Mira Nair . Erinnya lye Kwame kitaawe yalimubbula mu munnabyabufuzi Kwame Nkrumah, pulezidenti wa Ghana eyasooka. Bazadde be bombi basibuka Buyindi era kitaawe Musiraamu Omugujarati eyazaalibwa mu kibuga Bombay yadde nga yakulira mu Uganda, nnyina Muhindu Omupunjabi ow'ekika kya Nayyar eyazaalibwa mu Rourkela n'akulira mu Bhubaneswar . Bajjajjaabe ku ludda lwa kitaawe bazaalibwa mu bitundu olwaleero awasangibwa eggwanga lyaTanzania . Jjajjaawe azaala nnyina Amrit Lal Nair, yaliko omuserikale mu kitongole kya Buyindi ki IAS ate jjajjaawe omulala Praveen Nair yali mu kuguku mu by'embeera z'abantu n'enkulakulana era ye mutandisi wa Salaam Baalak Trust .

Mamdani yabeera mu Kampala okutuusa ku myaka etaano famire ye bweyasengukira mu Cape Town, mu ssaza Western Cape . Yasomera mu St. George's Grammar School e Mowbray nga kitaawe asomesa mu University of Cape Town . Oluvannyuma Mamdani n'enju ye baasengukira mu Amerika, nebasenga mu kibuga New York nga Mamdani wa myaka musanvu, era n'akulira mukitundu ekiyitibwa Morningside Heights . Obulamu bweyakuliramu azze abwogeerako nga obw'omukisa olwokuba teyeyabeerako mu mbeera ya kwetaaga oba kwegomba yadde nga akimanyi nti bwegutyo sibweguli eri banna New York abalala bangi.

Mamdani yasomera mu ssomero lya Bank Street School for Children mu bugwanjuba bwa Manhattan, gye yataandiikiriza ebyobufuzi nga yeesimbawo ku bwannamunigina mu kulonda kwabayizi era naawangula ekifo. Emiramwa gye emikulu gyesigama ku kusaawo obwenkanya n'eddembe kwossa okuwakanya okussa ssente mu byentalo wabula zissibwe mu byenjigiriza. Mu 2003, yakomawo kko mu Kampala okumala omwaka mulamba nga ali ne kitaawe mu luwummula lweyalimu. Ba jjajjaabe ne ba ssenga ku ludda lwa kitaawe bbo bakyabeera mu kibuga Kampala era bayambako kitaawe okumulabirira bweyali nga awandiika ekitabo kye kyeyawa omutwe Good Muslim, Bad Muslim .

Ebyamusikiriza

Mamdani agamba nti bazadde be be baamusikiriza okwagala ebyobufuzi n’ensonga z’ensi yonna engeri gyekyali nti ensonga zino zaayogerwangako nnyo awaka. Mamdani era yasikirizibwa nnyo okwenyigira mu byobufuzi oluvannyuma lw'okulaba ebirowoozo bya Bernie Sanders mu kampeyini ze ez'obwapulezidenti mu 2016 era nayingira ekisinde ki democratic socialists. Mu balala baayogerako nga abamusikiriza okugenda mu byobufuzi ye Daniel Hoan ne Victor L. Berger, wamu ne meeya Fiorello La Guardia .

Mu kampeyini ze ez’obwameeya, Mamdani yakakasa nga abalonzi nti obukulembeze bwe bwakufaananako nga obwa meeya wa Boston, Michelle Wu ne meeya wa Baltimore, Brandon Scott . Mu kampeyini, yatendereza Wu nga amwogwerako nga munnabyabufuzi munna DP asinga olw'enkola ze omuli entambula ey’olukale etali yakusasulira ekintu naye kyeyasuubiza mu kibuga New York.

Obulamu bwe obulala

Mamdani ayina obutuuze bwa nsi bbiri omuli Uganda ne Amerika era nga mu nsi ya Amerika yafuuka munnansi omujjuvu mu 2018. Musiraamu omushia era agwa mu kiwayi ekiyitibwa Twelver . Mu 2021, Mamdani yasisinkana omukozi w'obufaananyi bwa katuuni ate nga mukubi wa bifaananyi Rama Duwaji ku mutimbagano omugatta bantu ogwa Hinge . Bakkaanya okufumbiriganwa mu Gwekkumi 2024, era n'ebakola omukolo gwa nikah oluvannyuma lw’emyezi ebiri, era ne bafumbiriganwa mu Gwokubiri 2025 ku mukolo ogwali mu New York City Hall era baakola omukolo gwegumu mu Uganda mu Gwomusanvu 2025. Mamdani ne mukyala we babeera mu Astoria, Queens, okumpi ne Steinway Street . Ng’oggyeeko Olungereza, Mamdani asobola okwogera ennimi endala ezitakka wansi wa ttaano ku mitendera egyenjawulo okuli Hindi–Urdu, Bengali, Olusipaana, Luganda, n'Oluwarabu . Muwagizi nnyo wa Arsenal, naye era anyumirwa nnyo okulaba omuzannyo gwa cricket, ekigwo ekizungu ki All Elite Wrestling, kwossa omuzannyo gw'ensero nga awagira kiraabu ya New York Knicks. Mamdani era yaliko munnamawulire asaka ag'ebyemizanyo mu lupapula lwa Daily monitor mu Uganda

Laba ne

• Bannabyabufuzi Abayindi mu Amerika
• Abayindi Abamerika mu kibuga New York
• Abayindi mu Uganda
• Olukalala lw’aba Democratic Socialists of America abalina ofiisi za gavumenti
• Bannayuganda Abamerika