Aloysius Bugingo

Aloysius Bugingo munna Uganda omubuulizi w'enjiri ya Kuristo mu nzikiriza eyabalokole era ate nga era munna bizinensi. Bugingo ye musumba omukulu mu buweereza bwe Kanisa yabalokole eya House of Prayer Ministries International esangibwa e Makerere Kikoni mu kibuga kya Uganda ekikulu Kampala. Bugingo era ye mutandisi era akulira Salt Media Group of Companies nga kampuni eno y'etwala Laadiyo ya Salt Fm, n'omukutu gwa TV ogwa Salt Tv mu Uganda.Ku nkomerero y'omwaka 2019 Bugingo yalondebwa era naweebwa engule aba East Africa Book of Records ng’omusumba wabalokole eyasinga okuba owenkizo mu mwaka ogwo.

Obuto bwe n'emisomo

Aloysius Bugingo yazaalibwa mu mwaka 1972 mu disitulikiti ye Masaka. Nyina yali mukyala munna Uganda sso nga kitaawe yali asibuka mugwanga lya Rwanda era ono bweyasenguka nadda mu nsi ye ne nnyina wa Bugingo namugoberera ekyaviirako Bugingo okukuzibwa Jajja we azaala nnyina ate oluvannyuma nabeerako ne Kojja we. Olwembeera y'obwavu obunji Bugingo bweyakuliramu teyasobola kugenda wala nnyo namisomo era nawalirizibwa okuva ewaka okugenda mu Kampala okuyiiya obulamu

Bugingo nga atuuse e Kampala teyasooka kufunirawo mulimu wabula oluvannyuma yafuna abamuyinga ku musajja Ssentongo Godfrey, eyamuwa omulimu gwe ogwasooka mu kampala era nga guno gwali gwa kuyamba ku mirimu gyawaka oba kiyite House Boy . Ssentongo y'omu oluvannyuma yawa Bugingo omulimu gw'okutunda emberenge mu katale akayitibwa Owino . Bugingo yakola omulimu guno era nafissa ssente ezaamusobozesa okutandikawo bizinensi eyiye nga eno yali yakutembeya bintu by'omunyumba n’engoye z'abakyala mu Kampala.

Nga akuze Bugingo yaddayo kusomera era alina satifiketi eziwerako kwossa ne diguli mu by’eddiini gyeyasomera ku yunivasite y'omu kubasumba wa Balokole Pr. Simeon Kayiwa eyitibwa Kayiwa International University. Kyokka diguli ya Bugingo yaliko enkaayana ezaamanyi oluvannyuma lw'ekitongole ekivunanyizibwa ku byensoma mu matendekero agawaggulu ekya National Council for Higher Education Okuvaayo nekitegeeza nti Yunivasite Bugingo gyeyali asomedde yali teyina lukusa oba layisinsi kugaba diguli mu budde obwo.

Obuweereza bwe nga Omusumba

Olugendo lwa Bugingo okufuuka omusumba lwatandika ku Ssekukkulu ya 1992 bweyasalawo okwatula obulokozi. Bino byaliwo ku Kanisa ya Kampala Pentecostal Church (KPC) mu kiseera kino eyitibwa Watoto bweyalaba akatambi ka firimu eyitibwa Heaven’s Gates and Hell’s Flames era bwatyo nalokoka.

Bugingo oluvannyuma lw'okulokoka yegatta ku kanisa ya Victory Christian Centre mu Ndeeba nga eno esumbibwa omusumba Joseph Sserwadda Ono era yakubanga amasimu ku Laadiyo ya Impact Fm naddala mu pulogulaamu eyayitibwanga Embboozi z'Abalokole. Bugingo yatandika okukola ng’omuyambi mu Kanisa n'okwetaba mu kusinza. Era oluvannyuma naasumusibwa eddaala okufuuka omusumba. Mu kiseera kyekimu Bugingo yasigala nga akolera Impact FM nga akubiriza pulogulaamu nga eya Manya Kyokiriza .Ku nkomerero ya 2010 Bugingo yasalawo okulekulira obuweereza ku Victory Christian Center newankubadde nga kigambibwa nti omusumba omukulu Joseph Sserwadda teyasemba kikolwa ekyo.

Oluvannyuma lw'okwawukana n'omusumba Joseph Sserwadda, Aloysius Bugingo ne mukyala we Teddy baatandikawo obuweereza obwabwe bwebatuuma House of Prayer Ministries International (HPMI) Era nga ye nabantu beyasumbanga nga bakungaanira ku Bat Valley Theatre mu kampala ku luguudo oludda e Bombo.

HPMI yatandikawo laadiyo yayo eya Salt FM mu mwaka 2014 ne Salt Television mu 2015. Ekibiina ky’ekkanisa n’abawuliriza ku leediyo eno beeyongera buli lukya naddala olwokusaba kwa Bugingo okwomubudde obwamalya g'ekyemisana (lunch hour). Olwabantu okweyongera obunji ekanisa mu budde obwo eyali ku Bat Valley theatre yakakibwanga okupangisa ekisaawe ky'essomero lya Bat Valley Primary School okusobozesa abakkiriza okukungaana. Omuwendo gwa bakkiriza ba HPMI gweyongera era ekanisa nekakibwa okunoonya ekifo ekigazi bwetyo n'esengukira e Makerere mu kikoni ku kifo ekyakazibwako Canan Land.

Bugingo era yamanyibwa nnyo olwobutakkanya bweyayina n’abasumba abalala bangi abamannya mu Kampala era nga oluusi yabalangiranga okubba abakkiriza n'okwegaggawaza bokka na bokka.

Bugingo era yatandikawo enjigiriza eyali ekwata ku nnyiriri za Baibuli ezimu zeyalumiriza nti zaali zijjiddwa mu bugenderevu mu Bayibuli eyitibwa Good News ne King James Bible] Bugingo era yali awakanya Bayibuli ezijuliza Omwoyo Omutukuvu(Holy Sipirit) nga ‘Omuzimu Omutukuvu’ (Holy Ghost) ye kyeyali alumiriza nti sikyekimu era nga akikaatiriza nti teri 'muzimu' mutukuvu, ekitegeeza nti Bayibuli yonna eyogera ku Mwoyo Omutukuvu nga omuzimu Omutukuvu ya Sitaani era bwatyo mumwaka 2017 Bugingo yalangirira okwokya Bayibuli ye zeyayita eza ‘sitaani’. Bugingo yawawabirwa mu kkooti olwekikolwa kino mu kkooti ye Nabweru abakristu babiri okwali Aloysius Kizza Matovu n’omubuulizi w’enjiri Francisco Semugooma olw’okwokya Bayibuli kyokka n'eyegaana omusango guno nga agamba nti ye yali tayogera ku muliro gwa buliwo, wabula muliro ‘ogw’omwoyo’. Gyebyagwera nga Bugingo omusango agumezze oluvannyuma omulamuzi okutegeeza nti abawaabi balemwa okuleeta obujulizi obwenkukunala obumala okukasa kooti nti Bugingo yayokya Bayibuli.

Mu February 2019, ekkanisa ya Bugingo yawawaabirwa mu kkooti enkulu nga evunaanibwa okutaataganya abantu nga ereekanya ebidongo

Mu kiseera ky'omuggalo gwa ssenyiga omukambwe owa COVID-19 Bugingo yawaayo obukadde 10 obwa Uganda okuyambako gavumenti mu kulwanyisa ekirwadde kino.

Obulamu bwe obwabulijjo

Ku ntandikwa y’emyaka gya 1990, Bugingo yawasa Teddy Naluswa, era abafumbo bano baabeera mu bwavu. Yadde nga waliwo okusika omuguwa ku nzikiriza ya Bugingo [./Https://en.wikipedia.org/wiki/Born_again ey'Obulokole], baasigala bombi ku lw’abaana baabwe. Bugingo ne Naluswa balina abaana basatu ab’obuwala okuli Doreen Gift, Winnie ne Jenifer Bugingo n’omwana omu ow’obulenzi Miracle Bugingo.

Obufumbo bwa Bugingo ne Teddy bwafuuka amawulire g’eggwanga mu [./Https://en.wikipedia.org/wiki/Uganda Uganda] obutakkaanya bw’abafumbo bano bwe bw'afuluma mu lujjudde. Oluvannyuma Teddy yalekera awo okugenda mu kkanisa, era Bugingo n’ategeeza ekibiina ky’ekkanisa nti ye ne muwala waabwe Doreen baali bakola ekimenya obuweereza bwe era nga bagezaako okubba eby’obugagga by’ekkanisa. Bugingo yawoza nti Teddy yali asabye omugabo ku ttaka ly’ekkanisa ng’awaanyisiganya n’okwawukana. Bannaddiini abalala tebaasiima nneeyisa ya Bugingo. Mu 2019, Bugingo yavumirira babuulizi banne n’abantu bonna olw’okuvuma mukyala we Teddy mu lujjudde n’okwasanguza ebyama by’obufumbo bwabwe.

Teddy Bugingo yatongoza ekkanisa ye, Word of Salvation Ministries International (WSMI) mu January 2020. Mu 2020, abasumba bataano bagambibwa nti baava mu HPMI ne bagenda mu Kanisa ya Teddy Bugingo.

Mu September 2019 yabuuzibwa minisita Nakiwala ku [./Https://en.wikipedia.org/wiki/Child_neglect ky'okulagajjalira abaana] .

Oluvannyuma Bugingo yayingira omukwano ne Susan Makula. Mu December 2019, yalangirira nti yali lubuto lwa balongo.

Mu June 2021, kyategeezebwa nti yakwatibwa [./Https://en.wikipedia.org/wiki/COVID-19 COVID 19] .

ku ntandikwa y'omwaka 2024 nga 2 Ogwolubereberye 2024, Aloysius Bugingo yafuna ebisago mu bulumbaganyi obwatta omukuumi we, poliisi ya Uganda egamba nti enoonyereza ku “kugezaako okutta” kuno.