Beatrice Atim Anywar

Atim Beatrice Anywar

Beatrice Atim Anywar oluusi ayitibwa Beatrice Atim, oba Betty Anywar, yazaalibwa 9 Ogwolubeereberye,1964 munabyabufuzi Munnayuganda eyaliko omubaka wa palamenti akiikirira abantu ba munisipaali y'e Kitgum mu palamenti ya Uganda eye 10 (2016- 2021). Nga 14, Ogwekkumineebiri,2019, yalondebwa okuba minisita omubeezi avunaanyizibwa ku butonde bw'ensi mu kabineti ya Uganda era nga yasikira Dr. Mary Goretti Kitutu, eyatwalibwa mu minisitule y'ebyobugagga obwensibo n'amasanyalaze.

Ensibuko n'obuyigirize

Yazaalibwa mu disitulikiti y'e Kitgum mu Acholi mu bukiika kkono bwa Uganda nga 9, Ogwoluberebeerye,1964. Mu 1991, Yatikirwa dipulooma mu bwa kituunzi okuva ku ttendekero Makerere University Business School. Yeeyongera okusoma era mu 2004, yatikkirwa diguli mu nzirukanya y'emirimu okuva ku Islamic University in Uganda. Diguli ye ey'okubiri mu by'okudukanya emirimu eya Master of Public Administration and management yajisomera ku yunivasite e Makerere. Alina ne satifikeeti mu demokulasiya n'eby'obufuzi, gyeyafunira kutendekero Marquette University, mu ggwanga lya Amerika.

Emirimu gye

Nga tannayingira byabufuzi

Wakati wa 1991 ne 1993, Beatrice Anywar yeeyali avunaanyizibwa ku kifo awatukira ebyamaguzi mu kkampuni ya UFEL Uganda. Mu 1994 okutuusa 1995, yeyaali kituunzi omukulu mu kampuni enkozi y'emifaliso eya Vitafoam Uganda Limited bweyava awo yeegatta ku kitongole kya gavumenti ekivunaanyizibwa ku mazzi n'emidumu gya kazambi eya National Water and Sewerage Corporation nga avunaanyizibwa ku nsonga za bakasitoma era wano yakolawo emyaka 8 okuva mu 1996 okutuuka mu 2004.

Ng'atandise eby'obufuzi

Mu kibiina ky'eby'obufuzi ki FDC

Anywar yayingira eby'obufuzi ebyakalulu mu mwaka 2006 era navuganya ku kifo ky'omubaka akiikirira munisipaali y'e Kitgum. Akalulu yakawangula oluvannyuma lw'okumegga Santa Okote mu biro ebyo eyali agidde ku kaadi y'ekibiina ki National Resistance Movement. Mu kisanja kye ekyasooka mu paalamenti yalondebwa nga minista ow'ekisikirize ku ludda oluvuganya eyali avunaanyizibwa ku by'obutonde bw'ensi. Kino kyava ku kuba nga yali alwanirira eddembe ly'obutonde.

Anywar era ajjukirwa nnyo olw'obuvunaanyizibwa bwe mu kutaasa ekibira Mabira mu Uganda. Kino kyajjawo oluvannyuma lwa Pulezidenti Yoweri Museveni ne gavumenti ye okusalawo okutunda ekibira kino eri kampuni enkozi ya sukaali eya Sugar Corporation of Uganda Limited (SCOUL) esaanyeewo ekibira kino wekiri lifuuke essamba ly'ebikajjo. Anywae nga ayambibwako ebibiina ebirala ebitakabanira obutonde bw'ensi nga ekya ''National Association of Professional Environmentalists'' baawakanya nnyo okusalawo kuno era nebatisatiisa n'okukuunga abantu okuzira eby'amaguzi bya SCOUL n'ekigendererwa eky'okusanyalaza emirimu gyayo.

Mu 2007, bannayuganda abasoba mu 100,000 beegugunga mu mwekalaakaasa okwamanyibwa nga "Save Mabira Crusade" n'ekigendererwa okutaasa ekibira kya Mabira. Abantu basatu baafa, ate abalala nebalumizibwa. Oluvannyuma Amaka ga Atim Anywar gaasalibwako amagye ne poliisi naye kennyini n'akwatibwa era nasibwa nga avunaanibwa emisango egyekuusa ku butujju.

Nga munnabyabufuzi atalina kibiina

Mukulonda kwa palamenti mu 2016, Betty Anywar yawangulwa mu kusunsulamu eyali anaakwatira ekibiina ki Forum for Democratic Change bbendera. Anywar yeesimbawo kubwannamuninga atalina kibiina. Ebyava mu kalulu byalaga nga Anywar bweyali amezze bonna abaali bamwesimbyeeko era bwatyo naayingira paalamenti ey'ekkumi nga nnamunigina.

Mu mwezi Ogwekkumineebiri mu 2017, Anywar yeewunyisa bangi bweyalonda nga awagira ekiteeso ekyali kingenderera okukola ennongoosereza mu ssemateeka wa Uganda okusobozesa omuntu asussiza emyaka 75 okuvuganya kubwa Pulezidenti bwa Uganda.

Nga 14 Ogwekumineebiri 2019, yalondebebwa nga nga minista omubeezi avunaanyizibwa ku butonde bwensi muUganda nga yalondebwa Gen. Yoweri Kaguta Museveni.

Oluvannyuma Anywar yeegatta ku kibiina ki NRM era naayabulira oludda oluvuganya

Laba ne

• Margaret Lamwaka Odwar
• Winnie Kiiza
• Kabineti ya Uganda
• Kabineti ya Rwanda