Bazilio Olara-Okello
Bazilio Olara-Okello (1929 – 9 Ogwolubereberye 1990) yali Munnayuganda munnamajje. Yali omu kubaduumizi mu kibinja kyabayeekera ekya Uganda National Liberation Army (UNLA) nga kino kyekyegatta n'amaje ga Tanzania okuvuunika gavumenti ya Idi Amin mu 1979. Mu 1985, ono yaliko ssentebe w'akakiiko ka bannamaje akaayiitibwanga Military Council era bwatyo olw'ekifo ekyo nafuuka omukulembeze wa Uganda oluvannyuma yafuuka lieutenant-general era omudduumizi w'amaje ow'okuntikko.
Olutalo olw'ekiyeekera olwali mu Uganda oluvannyuma lw'akalulu ka 1980 bwelwatandika; UNLA (eyali emaze okufuuka eggye etongole ery'eggwanga) eyali erwanagana nabayeekera abaakulembeerwanga Yoweri Museveni mu kiwayi kye ekya National Resistance Army yafunamu ekizibu era nga kyava ku Pulezidenti wa Uganda mu biro ebyo Milton Obote okuboola nnyo Abacholi abaali mu maje ga Uganda era banji ku bbo omuli Olara-Okello ne Genero Tito Okello nebatuuka n'okujjibwa mu bifo eby'enkizo era nebasikizibwa Abalango (lino ly'eggwanga Obote mwe yali ava) nga Brigadier Smith Opon Acak eyaweebwa obwa Chief of Staff. Nga 27 Ogwomusanvu 1985, ekiwayi kya UNLA ekyaali kidduumirwa Olara-Okello era nga kyali kisingamu bajaasi Abacholi kyawamba gavumenti ya Milton Obote era Olara-Okello ne banne nebawamba obuyinza. Ekyaddirira kwali kusattulula Palamenti era akakiiko ka bannamaje aka Military Council nekatondebwawo. Wakati wa 27 ne 29 Ogwomusanvu 1985, Olara-Okello yeeyali ssentebe w'akakiiko ka banamaje kano aka Military Council era mu mbeera eyo n'aba nga ye mukulembeze owa Uganda.
Nga 29 Ogwomusanvu, Genero Tito Okello yasikira Olara-Okello ku bwa ssentebe bwa Military Council era bwatyo Olara-Okello naddayo mu maje era nakuzibwa okuva ku Brigadier naafuulibwa Lieutenant General era naafuuka omudduumizi wamaje. Yaduumira amaje okutuusa Yoweri Museveni ne banne aba National Resistance Army lwebawamba obuyinza nga 26 Ogwolubereberye 1986. Olara-Okello yawangangukira e Sudan gyeyabeera okutuusa lweyafa mu mwaka 1990. Olara-Okello yafiira mu ddwaliro li Omdurman Hospital mu kibuga Khartoum nga 9 Ogwolubereberye 1990.