Charles Peter Mayiga

  Charles Peter Mayiga (Yazaalibwa nga 1962) Munnayuganda, Munnamateeka, Mukulembeze mu Bwakabaka era muwandiisi wa bitabo. Ye katikkiro wa Gavumenti ya Kabaka eya Buganda, nga buno Bwakabaka obuli mu Ssemateeka wa Uganda eriwo. Mayiga okutuuka mu kifo kino yalondebwa Ssaabasajja Kabaka wa Buganda, aliko,Ronald Muwenda Mutebi II, mu Gwokutaano 2013, ng'adda mu bigere bya John Baptist Walusimbi.

Ebimukwatako

Charles Peter Mayiga yazaalibwa mu kyalo ky'e Kasanje, mu muluka gw'e Kabonera, mu Disitulikiti y'e Masaka, mu Masekkati ga Uganda. Bazadde be ye Ssaalongo Cyprian Mukasa ne nnyina Nnaalongo Rebecca Kyese Mukasa. Yasomera Butale Primary School ne mu Nkoni Primary School. Eddaala lya Siniya erya wansi yalisomera mu St. Henry's College Kitovu. Kyokka oluvannyuma ne yeegatta ku St. Mary's College Kisubi gye yatuulira S6. Alina Diguli mu mateeka eya Bachelor of Laws (LLB), gye yafunira mu Makerere University, Yunivasite ya Uganda esinga obunene n'obukadde mu za Gavumenti. Alina ne Dipuloma mu kukola amateeka eya Diploma in Legal Practice, gye yasomera ku ttendekero ly'ebyamateeka erya Law Development Center, mu Kampala, ekibuga kya Uganda ekikulu.

Emirimu gye

Okuva mu 1987, Mayiga abadde akolera wamu n'abantu abakulu mu Bwakabaka bwa Buganda, era abeebuuzibwako eby'ensonga ekyamuyamba ennyo okumanya n'okutegeera ennono n'empisa mu Buganda.

Nga 4 Ogwomusanvu 1991, ng'Obwakabaka bwa Buganda bwetegekera okuzzibwawo, Mayiga yalondebwa okubeera omuwandiisi w'olukiiko lw'abakulu abaalondebwa okuteekateeka n'okuzzaawo ennono z'Obuwangwa bw'Abaganda n'Okuzzaawo obukulembeze bw'Obwakabaka. Oluvannyuma ekitiibwa kino kyakyuka n'afuuka omuwandiisi ssetteeserezo wa Buganda ayitibwa Lukiiko oluvannyuma lw'okuzzibwawo kw'Obwakabaka. Obwakabaka bwe bwazzibwawo mu 1993, Mayiga yalondebwa okubeera Minisita w'amawulire era omwogezi w'Obwakabaka omutongole. Yaweereza mu kifo kino okutuusa lwe yalondebwa ku Bwatikkiro wa Buganda mu Gwokutaano, 2013.

Nga tannalondebwa nga Katikkiro, Mayiga yali agaanyi ebifo ebisukka mu bibiri (2) ebyali bimuweereddwa mu Gavumenti eya wakati - Gavumenti ya Uganda.

Ebimukwatako eby'omunda

Mayiga munnamateeka mu kkampuni ya Buwule and Mayiga Company Advocates, esangibwa mu Kampala, ekibuga kya Uganda ekikulu era ekibuga ekisinga obunene mu Uganda. Yawasa Margaret Mayiga, eyasomerako ku Trinity College Nabbingo, okuva mu 1987. Ye muwandiisi w'ekitabo ekiyitibwa King On The Throne, ekinnyonnyola emyaka 16 egyasooka (1993–2009) egy'obufuzi bwa Kabaka Muwenda Mutebi II owa Buganda. Mayiga era yawandiika Buganda ku Ntikko, ekitabo ky'Oluganda ekiraga empagi z'Obwakabaka ettaano. Ekitabo kino kyafulumizibwa nga 29 Ogwokutaano 2013, olunaku lwennyini lwe yaweebwa obuyinza obujjuvu mu kifo ky'Obwakatikkiro wa Buganda. Mu 2017, Mayiga yafulumya ekitabo kye ekyokusatu, ekiyitibwa Uganda:7-Key Transformation Idea, ekinnyonnyola ebirowoozo musanvu ebisobola okuyamba ensi ezikyakula okwebbulula.

Ebijuliziddwa okuva wabweru wa Wikipediya

• "Buganda, Centenary Bank partner in Kasubi tombs drive", New Vision, 21 February 2014
• "Katikiro Mayiga Leadership Style Proves Critics Wrong", New Vision, 12 December 2013